នៅព្រឹកថ្ងៃអង្គារ ទី៣០ ខែកញ្ញា ឆ្នាំ២០២៥ ឯកឧត្ដម ឈើយ ចាន់ណា លេខាធិការគណៈកម្មការទី៧ព្រឹទ្ធសភា និងជាលេខាធិការក្រុមសមាជិកព្រឹទ្ធសភាប្រចាំភូមិភាគទី៤ បានអញ្ជើញជាអធិបតីក្នុងការប្រារព្ធពិធីបើកបវេសនកាលឆ្នាំសិក្សាថ្មី ឆ្នាំ២០២៥-២០២៦ និងចែកវិញ្ញាបនប័ត្រ ប័ណ្ណសរសើរ លិខិតសរសើរ សម្ភារៈសិក្សាដល់សិស្សានុសិស្ស ចាប់ពីថ្នាក់ទី១ ដល់ថ្នាក់ទី១0 ស្ថិតនៅសាលា សេហ្វហេវ៉ិន។ ពិធីនេះមានការអញ្ជើញចូលរួមដោយ ឯកឧត្ដម ហ៊ូ ប៊ុនហេង សមាជិកក្រុមប្រឹក្សាខេត្ត ឯកឧត្ដមឧត្ដមសេនីយ៍ទោ កែវ សេងឡាយ មេបញ្ជាការរងអគ្គបញ្ជាការដ្ឋានរថក្រោះអគ្គបញ្ជាការ និងជាមេបញ្ជាការរថក្រោះប្រចាំទិសយោធភូមិភាគទី៥ លោកអនុប្រធានការិយាល័យអប់រំក្រុង លោក ខាត់ ធា ចៅសង្កាត់និមិត្ត នាយបុស្តិ៍ លោក អ៊ិន ជំនោរ នាយកអង្គការ កម្ពុជានៃក្ដីសង្ឃឹម លោកនាយក លោកគ្រូ អ្នកគ្រូ មាតាបិតា អាណាព្យាបាលសិស្ស ស្ថិតនៅភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះ ឯកឧត្តមក៏បានផ្តល់នូវគំនិតមួយចំនួនជូនចំពោះគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សផងដែរ ដើម្បីរួមគ្នាក្នុងការបណ្តុះបណ្តាលធនធានមនុស្សប្រកបដោយចំណេះដឹង សមត្ថភាពខ្ពស់ ភាពច្នៃប្រឌិត នវានុវត្តន៍ ក្រមសីលធម៌ គុណធម៌ខ្ពស់ និងស្រឡាញ់សង្គមជាតិ។

ប្រភព៖ ការិយាល័យជំនួយការគណៈកម្មការទី៧ព្រឹទ្ធសភា